Geo Challenge, edukasyunal na aplikasyon sa Facebook

Matagal din akong nahumaling sa paglalaro ng Pet Society, Restaurant City, Farmville, Roller Coaster Kingdom at Friends for Sale bago ko pa man madiskubre ang Geo Challenge. Panigurado akong alam niyo ang mga larong iyan dahil ilan lamang iyan sa mga aplikasyon ng Facebook na talaga namang patok sa taong walang magawa sa buhay.

Naaalala ko pa noon nu'ng nagta-trabaho ako sa Etelecare bilang customer service associate, kapag lunch break ay mabilis akong kumakain sa pantry para lamang maigugol ang mga nalalabing minuto sa Pet Society. At ang tangi kong ginagawa sa pet kong si Kuchi ay ang isapalaran ang naipundar niyang salapi sa Stadium kung saan lagi akong umuuwing luhaan. May mga pagkakataong ibenebenta ko pa ang kanyang mga kagamitan sa bahay para lamang may maipansugal. Eh paano naman kasi siya mabubuhay ng walang kalatoy-latoy ang disenyo ng bahay niya? Kaya naiisip kong magsugal sa karera. Malay mo palarin at maging instant interior designer ako ng bahay ni Kuchi.


Medyo huli na nang maglaro ako ng Restaurant City. Kaya naman hindi ako nahumaling kasi tinamad na kong maglaro nu'ng nalaman kung anong lebel na ang mga kaibigan ko. Naisip kong hindi ko na rin naman sila nahahabol kaya wala ring silbi ang pagpapakaadik ko.



At ang Farmville. At kailan ko pa pinangarap maging magsasaka? Nakakaasar lang kaya medyo itinigil ko na rin ang paglalaro nito. Sa Roller Coaster Kingdom naman ako masyadong naadik, halos magdamag akong naka-online para pakainin ang mga trabahador ko sa perya. Pero nu'ng nagcheat 'yung kasama ko sa dorm at milya-milya na ang pagitan ng salapi at lebel naming dalawa, nawalan ako ng gana. Putsa, pinaghirapan ko 'yun tapos may mas madali palang paraan para magparami ng pera? Hindi ka pa pagpapawisan.


Sa Friends for Sale, natutunan kong ibenta ang sarili ko. Matuto akong mamilit ng mga kaibigan para lamang tumaas ang halaga ko. Naisip ko rin: Kailan pa maaaring bilhin ang isang kaibigan? Minsan hindi ko pa kilala ang bumibili sa'kin. Pero okay lang basta tataas pa rin ang halaga mo. Sa kasalukuyan, umaabot na sa isandaang milyon ang halaga ko at hindi ako titigil hangga't hindi ko matapatan ang halaga ng mga kaibigan ko. Haha. :D


At ang Geo Challenge. Sa una ay nakornihan ako sa larong ito dahil sino ba naman ang maglalaro kung ang itatanong naman sa'yo ay mga watawat ng mga bansa, pangalan ng lungsod na ipinapakita sa mapa, eksaktong lokasyon ng mga siyudad sa buong daigdig at kung saan matatagpuan ang mga sikat na historikal na pook?

Subalit naging edukasyunal na aplikasyon para sa isang maritime student na tulad ko ang Geo Challenge. Lalo na ngayong may asignatura akong World Geography. Nakatulong ng husto ang mga aral na inihatid ng larong ito sa diskusyon at pagsagot sa mga pagsusulit. Naisip ko ring balang araw ay magagamit ko rin ang mga kaalamang napulot ko sa Geo Challenge kapag nasa barko na ako.

Kaya naman natuwa ako dahil wala akong maling sagot sa midterm exam namin sa World Geography. Ginamit ko ang Geo Challenge na kasangkapan para matuto ng sabjek sa masayang paraan.

Salamat sa pagbabasa. :D

Isang indie film, napiling kinatawan ng bansa para sa 82nd Oscars

Isang independent film ang napili ng Film Academy of the Philippines (FAP) na maging kinatawan ng Pilipinas para sa gaganaping iak-82 Academy Awards' best foreign language film category sa susunod na taon -- ang Ded na si Lolo ni Soxie H. Topacio.

Tinalo ng Ded na si Lolo ang ilan sa mga pelikulang nag-iwan ng kasaysayan sa industriya ng pelikulang Pilipino sa pamamagitan ng paghakot ng mga parangal tulad ng:

BALER. Ang Baler ay kalahok sa ika-34 na Metro Manila Film Festival noong nakaraang taon. Ang pelikulang ito ay halaw sa tunay na kaganapan sa kasaysayan ng bansa. Pinagbibidahan ito nina Anne Curtis, na nanalong Pinakamahusay na Pagganap ng Isang Pangunahing Aktres, at Jericho Rosales. Nakamit din ng produksyon ang Pinakamahusay na Pagganap ng Isang Pangunahing Aktor (Philip Salvador), Pinakamahusay na Direksyon (Mark Meily), Pinakamahusay na Dulang Pampelikula (Roy Iglesias), Pinakamahusay na Sinematograpiya (Lee Alejandro), Pinakamahusay na Disenyong Pamproduksyon (Aped Santos), Pinakamahusay na Editing (Danny Romero) at Pinakamahusay na Pelikula. Nasungkit din nito ang ilang natatanging gantimpala tulad ng Gender Sensitive Award at Gatpuno Antonio Villegas Cultural Award.

*Sa aking pananaw, ang Baler ang nararapat na maging kinatawan ng Pilipinas para sa nasabing patimpalak dahil bukod sa hulagway ito ng kasaysayan ng bansa, mahusay din ang pelikula sa lahat ng aspeto tulad ng direksyon, sinematograpiya at pagpili sa mga artista na gaganap.

JAY. Isa ring independent film ang Jay na kalahok sa ika-apat na Cinemalaya Film Festival 2008. Ito ang kauna-unahang pelikula na idinerehe ng baguhang direktor na si Francis Pasion. Tampok dito sina Baron Geisler na gumanap bilang baklang prodyuser, at tinanghal bilang Pinakamahusay na Pagganap ng Isang Pangunahing Aktor sa nasabing award-giving body at si Coco Martin na kamakaila'y tinanghal bilang Best Actor para sa pelikulang Serbis sa katatapos lang na ika-32 Gawad Urian.

*Ang paksang tinatalakay sa pelikulang ito ay lubhang sensitibo kaya naman ideyal na kinatawan subalit hindi tiyak kung magugustuhan ng mga hurado ang direksyon lalo na sa panahon ngayon kung kailan sinasabing ginintuang panahon ng mga independent films.

100. Kalahok din sa ika-apat na Cinemalaya Film Festival 2008 ang pelikulang 100 na pinagbibidahan nina Eugene Domingo, Tessie Tomas at Mylene Dizon (na nagwagi bilang Best Actress). Hinakot nito ang mga parangal sa Cinemalaya tuald ng Best Director (Chris Martinez); Best Screenplay (Chris Martinez); BestSupporting Actress (Eugene Domingo) at Audience Choice Award. Naging kinatawan din ng bansa ang pelikula sa mga pandaigdigang patimpalak tulad ng Festival du Film de Marrakech 2008 sa Morocco at ika-13 PUSAN International Film Festival sa South Korea. Naging Audience Choice Award din ito sa naganap na Korean New Network 2008.

*Mahusay din ang pagkakagawa ng pelikula ngunit hindi gaanong napansin nang maihanap sa mga pelikulang nauna nang nabanggit.

MANILA. Ang pelikulang Manila ay handog ng mga direktor na sina Raya Martin at Adolfo Alix Jr. para kina Ishmael Bernal (Manila by Night) at Lino Brocka (Jaguar). Ginampanan ni Piolo Pascual ang dalawang magkaibang papel -- bilang William, isang binatang lulong sa droga na nais makita ang sarili at makihalubilo sa kapwa sa Day Segment, at bilang Philip, isang badigard ng anak na lalaki ng alkalde na nag-aakalang itinuring na siya ng mga ito bilang kasapi ng pamilya. Naipalabas ang pelikula sa buong mundo at naging kasapi ng ika-62 Cannes Film Festival sa France at naisama sa eksibit na pinamagatang Films Around The World sa ika-31 Moscow International Film Festival.

*Naging matunog ang pelikula dahil sa pagkakaganap ni Piolo Pascual at ang pag-aalay ng pelikula sa dalawang alamat sa industriya ng pelikulang Pilipino. Iyon lamang.

ADELA. Ang beteranang aktres na si Anita Linda ang pangunahing tauhan ng pelikulang Adela. Naging Best Actress siya ng FAMAS (dalawang beses), Gawad Urian, Young Critics Circle at Gawad Tanglaw. Isa ang Adela sa mga pelikulang kalahok para sa ContemporAsian na gaganapin sa Museo ng Modernong Sining (Museum of the Modern Art) sa New York. Naging kinatawan din ang pelikula sa mga prestihiyosong patimpalak sa Toronto, Pusan, Rotterdam at Moscow.

*Tiyak na maantig ang damdamin mo sa paraan ng pagkakaganap ng beteranang aktres na si Anita Linda ng pangunahing tauhan. Para sa akin, ito ay ikalawa sa Baler.

PBA09spqr315

Michael V, tinanghal na best actor sa 1st MTRCB Awards

Si Michael V bilang si Yaya

"For me, you're such a winner," ito ang linyang binitiwan ng komedyanteng si Michael V sa hindi niya inaasahang pagkapanalo bilang Best Actor sa ginanap na gabi ng parangal ng kauna-unahang Movies and Television Review and Classification Board (MTRCB) Awards sa Gateway Cinema 5 noong ika-4 ng Setyembre.

Si Michael V ang creative director ng mga nakakatawang programa sa telebisyon na "Bitoy's Funniest Videos" at "Bubble Gang" na talaga namang humahataw sa TV ratings.

Matagal ko nang idolo si Michael V sa larangan ng komedya kahit pa man isa akong Kapamilya. Lalo na kapag ginagampanan niya ang papel bilang Yaya sa spoof segment na "Ang Spoiled" ng Bubble Gang kasama si Ogie Alcasid. Higit pa akong humanga sa natatanging talento niya na kung saan ay nag-iiba siya ng katauhan. Pinasikat niya rin ang maraming awitin tulad ng Mas Mahal na Kita Ngayon at Hindi Ako Bakla. Likas sa kanya ang pagpapatawa kaya naman patok sa panlasa ng masa.

Bumalik tayo sa 1st MTRCB Awards.

Tulad ng pagkakapili kay Michael V, hindi rin inaasahan ang mga artista at programang tinanghal dahil very well-distributed ang mga parangal mula sa mga himpilan ng telebisyon tulad ng ABS-CBN, GMA7, QTV at TV5.

Nanalong Best News Program ang Balitanghali ng QTV. Nakakagulat ang hindi pagkapili ng TV Patrol (ABS-CBN) at 24 Oras (GMA7) na matagal na sa larangan ng pamamahayag.

I-Witness (GMA7) ang nagwaging Best Public Affairs Show. Well-deserved. Matagal na rin akong napapahanga sa mga dokyumentaryong ineere ng programang ito. Kakaiba at ang mga paksa ay hindi karaniwang nasasaling ng mga direktor.


Best Education Show ang Sineskwela. Wala nang iba pa.

Nasungkit ng Mustard TV ng TV5 ang Best Children's Show. Magandang simula para sa isang baguhang TV network.

Bago pa man tanghalin bilang Best Reality Show ng MTRCB Awards, umani na ng mga parangal at pagkilala ang I-Survived ni Ces Oreña-Drilon ng ABS-CBN. Kaya naman hindi na ako nagtaka pa dahil napanuod ko naman ito.

Usap-usapan na rin ng bayan ang programa ng TV5 na Talentadong Pinoy hosted by Ryan Agoncillo at ito ang nagwaging Best Talent Show. Saludo rin ako sa pamunuan ng palabas na ito dahil sa matapang na pagsabak sa primetime ratings kung saan katapat ng programa ang ilan sa top-rating programs na nakalineup sa ABS-CBN at GMA -- ang Bitoy's Funniest Videos at Maalaala Mo Kaya: Ang Tahanan Mo.

Hindi ako sang-ayon sa pagkapili ng Wow Mali (TV5) bilang Best Comedy Show. Dahil para sa akin, ang Banana Split (ABS-CBN), Goin' Bulilit (ABS-CBN) at Bubble Gang (GMA7) ang mas nararapat para sa parangal na ito.

Best Drama Special ang episode na Butch ng Obra (GMA7) kung saan nagulat din ako sa desisyon dahil palagi akong nanunuod ng mga episodes ng MMK at sadyang nangingilabot lamang ako makabagbag-damdaming mga tagpo at eksena.

Kahit Isang Saglit (ABS-CBN) na pinagbibidahan ni Jericho Rosales at Carmen Soo ang nagwagi bilang Best Teleserye. Para sa akin, Tayong Dalawa ang mas deserving. Haha. (PS Paborito ko kasi sina KIM at GERALD.)

Iginawad kay Bea Alonzo (Betty La Fea, ABS-CBN) ang Best Actress. Samantala, si Edu Manzano (Pilipinas GKNB?, ABS-CBN) at Jessica Soho (Kapuso Mo, Jessica Soho, GMA7) ang nakapag-uwi ng mga parangal bilang Best Hosts.

Nabigyan din ng natatanging parangal ang May Bukas Pa para sa Special Award for Promoting Moral Values.

10% increase sa service fee, ipinatupad ng private hospitals

Sa kabila ng apela ng gobyerno, hindi natinag ang grupo ng mga pribadong ospital at tuluyang ikakasa bukas ang nakatakdang sampung porsyentong (10%) dagdag-singil sa mga bayaring pang-ospital. Ayon kay tagapagpasalita ng Private Hospitals Association of the Philippines (PHAP) na si Rustico Jimenez, hindi na mapipigilan pa ang pagpapatupad nito at nakahanda ang grupo sa anumang magiging aksyon ng gobyerno laban sa kanila.


Nakakainsulto ang naging hakbang ng PHAP. Kung iyong susuriin, walang magagawa ang taumbayan kundi isabalikat ang karagdangang singil dahil pribadong sektor na ang nagdesisyon at ibaling ang sisi sa kasalukuyang administrasyon. Nakakapanlumong isiping nagawa nila ang ganitong 'di makatarungang hakbang sa kasagsagan ng krisis-pinansyal at pambansang kahirapan.

Iginiit ni Jimenez na malaki ang salaping nalugi sa mga pribadong ospital bunsod ng pagpapatupad ng singkwenta-porsyentong diskwento sa presyo ng mga pangunahing gamot sa bansa dulot ng Cheaper Medicines Law. Nabigo rin umano ang sektor sa paghingi ng rebate sa mga kumpanyang parmasyutikal.

Kasunod ng pag-anunsiyo, nagbanta si Alexander Padilla ng Kagawaran ng Kalusugan sa PHAP na hindi palalagpasain ng gobyerno kung sakaling makitaan nila ng mga paglabag sa batas ang mga pribadong ospital kabilang na rito ang pagtakas sa masusing inbentaryo.

Hindi ko nagustuhan ang hayagang pagmamatigas ng PHAP. Hindi ako nagtitiwala sa kasalukuyang rehimen, subalit hindi ito sapat para bigyan ng panibagong pasakit si Juan dela Cruz.

Paramour

Lifeless, she is lying down on a dark alley.

I look around with heart pounding with paranoia.
Voices from somewhere deafened my ears.
Not a single move, I just cannot run.

I heard approaching footsteps from behind.
Something from within dictates me to flee.
Yet, every piece of me rips as I kiss her goodbye.
Her face was deadpan as if she suffered nothing.

Oh, Morpheus, let me go...
For I love her too much to condemn her.

Scenes change its turns and twists.
The night goes eerier as I seek salvation.
I found myself running against the wind.
Without a soul, without a heart.

I kneel down gasping as I finally surrendered.
Convict me now, I am a paramour.
Gasping, I lay down in an eternal slumber.
Just few steps away from my breath.

I killed her and since she is my life,
Thus I must be dead now.
Now that I feel so worthless.
Oh, Morpheus, set me free.

Lord, redeem me up in the sky.
Beyond the guilt, within those clouds.

*This poem was published in TIP Voice (The Official School and Student Publication of Technological Institute of the Philippines-Manila) by the same author. Click here to visit the publication's official website.

Half Here, Half There

a silhouette of a mother and child

It is the last day of the month.

The perpetrator spares no one.

If only a mortal could perform multiple tasks at the same time, there would be no problem then. The round-the-clock store turned off its lights. Then, she fled from street to street in the rhythm of the rain -- drowsy, weary and hungry.

The footsteps got slower as it reached the door. Silence reigned as the hide-and-seek commenced. The door opened, the game got exciting.

She let out a sigh of relief before entering the lecture room. This moment, she will not count money. But jot down notes instead.

Dolls dressed elegantly fell on the floor. A picture frame on the desk crashed, the glass broke into pieces as it touched the ground. It was a picture of a happy family without a father.

There she was, waiting for a ride. She kissed the darkness goodbye as she walked towards the halted cab. It was just a couple of minutes. Yet, it seemed to be late.
Screams echoed in every corner of the room as the innocent blood tainted the floor. Innocent angels begged mercy but the monster granted none. As if he was draining all the life remained in their good hearts. They uttered their mother's name as they took their last breath.

She finally got home with her children's favorite food. Excitedly, she opened the wood-carved door of the apartment. Her world shattered as darkness faded and revealed a horrendous sight.

Then the solemn night turned into a vile, eerie nightmare as she struggled for survival.

Angelica Panganiban to play femme fatale in ABS-CBN's Rubi

Nasubaybayan natin kung paano niya ginawang masalimuot ang buhay ni Catherine Ramirez (Claudine Barreto) sa top-rating primetime series na Iisa Pa Lamang. Nasaksihan natin kung paano niya bitawan ang mga maaanghang na salita sa mga makapigil-hiningang eksena. Nagulat ang lahat nang ang dating aktres na tanging mapapanuod lamang sa mga youth-oriented anthology ay sumabak sa heavy drama program kung saan binigyan niya ng buhay ang papel ni Scarlett dela Rhea.

At sa kanyang pagbabalik, isang panibagong karakter ang bibigyan niya ng buhay. Muli, bilang bida na kontrabida. Si Angelica Panganiban bilang Rubi sa Philippine adaptation ng Rubi (Ang Bidang Kontrabida) na unang pinalabas sa Mexican television network Televisa noong 2004.

Subalit sa pagkakataong ito, hindi na socialite villain ang papel na kanyang gagampanan dahil born to privilege si Rubi. Makakatambal niya si Diether Ocampo na gaganap bilang Alejandro Cardenas. Kasama rin ang ilan sa mga pinipitagang artista ng henerasyon tulad nina Kim Chiu, Gerald Anderson, Jake Cuenca, Shaina Magdayao, Cherrie Pie Picache, Kaye Abad, Nikki Gil, Erich Gonzales, Joross Gamboa, Gardo Versoza, Cherrie Gil at Alessandra de Rossi.

Abangan ang nalalapit na pagsisimula ng Rubi sa ABS-CBN Primetime Bida.

Ms. Eugene Domingo, patok sa takilya

Dati pa man, batid ko nang mahusay na komedyante si Ms. Eugene Domingo. Hindi dahil nakapagtapos siya ng Communication Arts sa Unibersidad ng Pilipinas, kundi dahil kapansin-pansin ang ipinapakita niyang "superb thespian prowess" sa mga pelikulang "Ang Tanging Ina" at "Da Lucky Ones" kung saan supporting role lamang ang mga papel na kanyang ginampanan.

Kaya naman hindi na ako nagtaka noong nalaman kong tumabo sa takilya ang unang pelikulang kanyang pinagbidahan - ang Kimmy Dora (Kambal sa Kiyeme). Sa pagkakataong ito, tuluyan na niyang naabot ang pedestal ng kasikatan.

Noong Setyembre 18, pinanuod ko kasama ng aking pinakamatalik na kaibigan ang Kimmy Dora. Kung hindi ako nagkakamali, ikaapat na linggo na iyon ng pamamayagpag ng nasabing pelikula. Naengganyo akong panuorin ito dahil pakiwari ko'y ako na lamang ang tanging tao sa mundo na hindi pa nakakapanuod nito. Karamihan sa aking mga kaibigan ay humanga sa taglay na husay sa pag-arte ni Ms. Eugene Domingo pati na rin ang buong produksyon ng pelikula.

Ako 'yung tipo ng taong once in a blue moon lang magwaldas ng salapi para sa isang pelikula. Sa katunayan, kung maaaring makabili ng pirated copy sa Quiapo o ipadownload sa aking iPod, hindi na ako manunuod pa. Subalit sa pagkakataong ito, batid kong hindi ko pagsisisihan ang pagtapyas ko sa aking weekly allowance.

Naiprodyus ang pelikula sa ilalim ng Spring Films, isang baguhang kumpanya sa larangan ng film production sa pangunguna ng premyadong direktor na si Bb. Joyce Bernal at batikang aktor na si Piolo Pascual. Naipalabas sa SM Cinemas ang pelikula sa kabila ng pagiging baguhan ng kumpanya.

Ms. Eugene Domingo deserves a round of applause. Isa na siya sa mga hinahangaan at tinitingala kong mga artista sa industriya ng pelikulang Pilipino. Higit pa kong humanga sa kanyang naiibang pagganap ng dalawang magkaibang papel (Kimmy at Dora) sa iisang pelikula.

Ang Kimmy Dora ay kuwento ng kambal ni Luisito Cacanindin-Go Dong Hae - sina Kimmy at Dora. Ang kambal ay may magkaibang ugali at katayuan sa buhay. Si Kimmy ay matalino, dominante at arogante samantalang si Dora naman ay inosente, childish at sweet. Iikot ang istorya sa pagnanasa ni Kimmy na makuha ang malaking bahagi ng Go Dong Hae empire matapos niyang malaman na walumpung bahagdan nito ay ipapamana kay Dora ayon sa huling testaamento ng kanilang ama na nakaratay sa banig ng karamdaman.

"I'm just a girl, floating in front of a boy, asking him to love her," ito ang isa sa mga nakakatawang dayalog ni Kimmy na sinabi niya kay Johnson (Dingdong Dantes) na matagal na niyang pinagpapantasyan.

Hindi na ako magpapaliguy-ligoy pa, nais kong mailuklok si Ms. Eugene Domingo bilang Reyna ng Komedya (Pasintabi kay Ms. Ai-ai delas Alas.) Congratulations, Ms. Eugene Domingo, Bb. Joyce Bernal at Piolo Pascual for making a movie worth watching for!

Para sa karagdagang mga detalye, bisitahin ang opisyal na website ng pelikula: www.kimmydora.com at ang opisyal nitong account sa Facebook: http://www.facebook.com/pages/Eugene-Domingo/61057672796

PBA0986r6qr5